HakiElimu yapinga kufutwa kwa matokeo ya mitihani ya Kidato cha 4

   


SERIKALI imetakiwa kuacha kukurupuka kufuta matokeo ya kidato cha nne mwaka 2012 kutokana na sababu za msingi za kufeli kwa wanafunzi hao zinafahamika.

Hayo yalielezwa jana jijini Dar es Salaam na muungano wa asasi tano za kiraia uliowakilishwa na Mkurugenzi Mtendaji wa HakiElimu, Elizabeth Missokia.

Asasi zilizotoa tamko la pamoja huku zikipendekeza njia sahihi ya serikali kuwekeza katika elimu ni pamoja na Hakielimu yenyewe, Policy forum, Sikika, TenMet na TGNP.

Kwa niaba ya mitandao hiyo mkurugenzi huyo alisema hakukuwa na haja ya kufuta matokeo hayo na kufanya maboresho kwa kuwa sababu zilizosababisha kufeli kwa wanafunzi zinajulikana na si kama serikali inavyodai kwa sasa.

Missokia alisema kabla ya serikali kutoa uamuzi huo ilitakiwa kuweka wazi mapendekezo ya Tume ya Waziri Mkuu iliyoundwa kuchunguza matokeo hayo ili wadau wa elimu wapate fursa ya kuona sababu zilizochangia kushuka kwa ufaulu katika mitihani hiyo.

“Kwa kufuta matokeo hayo bila wadau kujua sababu na kutoa mchango wao inawaaminisha Watanzania kwamba sababu nyingine hata kama zipo ziliathiri kwa kiwango kidogo matokeo hayo na suala la upangaji wa madaraja kuonekana ni sababu kubwa zaidi kuliko nyingine,” alisema Missokia.

Alisema hiyo sio sababu kwani matokeo ya kidato cha nne yaliyopita huku akiyataja ya mwaka 2009 yalikuwa asilimia 27.5 ya watahiniwa waliopata daraja sifuri, mwaka 2010 sifuri walikuwa 49.6 na mwaka 2011 asilimia 46.4 ambayo ni matokeo mabaya pia.

Alisema kwa mtiririko huo wa matokeo ni lazima kulikuwa na sababu kubwa zaidi iliyochangia kushuka kwa ufaulu na kwamba hakuna uhusiano wa moja kwa moja kati ya kubadili utaratibu wa kupanga matokeo na ufaulu duni wa 2012.

Ilielezwa kuwa sababu nyingine ni kutokuwa na walimu wa kutosha hasa kwa masomo ya sayansi; shule kuwa na upungufu mkubwa wa vitabu na vifaa mbalimbali vya kujifunzia na kufundishia; bajeti ya maendeleo shuleni kuwa ndogo; ruzuku mashuleni kufika ikiwa pungufu na wakati mwingine ikiwa imechelewa; mihtasari ya kufundishia ina mkanganyiko mkubwa; na huku mtaala mpya wa mwaka 2005 ukiwa mgeni kwa walimu walio wengi.

“Msingi mbovu wa lugha ya Kiingereza ambayo ndiyo lugha ya mawasiliano darasani; walimu kutokuwa na hamasa ya kufundisha kutokana na madai ya muda mrefu na kufanya kazi katika mazingira magumu sambamba na kukosekana kwa mafunzo kazini ya kuwaimarisha katika ufundishaji wao; na hamasa ndogo miongoni mwa wazazi katika kufuatilia malezi ya watoto wao,” alisema Missokia.

Hata hivyo alieleza kuwa kuandaliwa upya kwa matokeo hayo, serikali inatakiwa ikumbuke kuna athari mbalimbali ambazo zitatokea ikiwa ni pamoja na baadhi ya wanafunzi ambao walijiua baada ya kupata matokeo mabaya.

“Sasa endapo watapata alama za juu nani atakayetakiwa kuwajibishwa kwa hilo?”

Pia kuna baadhi ya wanafunzi na wazazi wameshafanya maamuzi mbalimbali, pamoja na waliokata tamaa na wamepata madhara makubwa kisaikolojia na wengine kukubali kurudia mitihani na kuhoji serikali itatoa fidia gani.

Pia waliwashukia NECTA kutokana na kukanusha kutumika kwa utaratibu mpya wa upangaji wa madaraja huku wakihoji hivyo iliwadanganya Watanzania.

Asasi hizo pia zilieleza kuwa kwa kuwa serikali imeamua kufuta matokeo hayo na hatimaye kupangwa upya kwa utaratibu wa mwaka 2011 zilishauri zoezi hilo kufanyika kwa uwazi kwa kushirikisha wadau wengine wa elimu ili kujiridhisha na uhalali wa alama za wanafunzi zitakazokuwa zinarekebishwa na siyo uchakachuaji katika njia za urekebishaji na upangaji wa matokeo katika madaraja.

Taasisi ya Hassan Maajar yasaidia madawati

Ama kweli watoto wakikalia madawati wanakuwa na furaha kabisa kama hawa

Wakaamua kuchea na ngoma kabisa kushukuru

                                                          Ukafika muda wa nasaha za tukio hilo

                              Blog hii inapongeza juhudi zifanywazo na Hassan Majaar Trust Fund

                              na tunaomba wadau kuisaidia taasisi hii 

Na Mwandishi Maalum  

Zaidi ya wanafunzi 750 katika shule saba za wilaya ya Singida zitapokea msaada wa madawati yaliyotolewa kwa ushirikiano kati ya Taasisi ya Hassan Maajar Trust na Shirika La Nyumba La Taifa  

Jumla ya madawati 264 yanatolewa na wabia hao kupunguza tatizo sugu la upungu wa madawati katika shule hizo. 

 

Hafla ya kukakabidhi madawati hao, imefanyika katika Shule ya Msingi ya Munisa, iliyoko Halmashauri ya Singida.  Bwana Shariff Maajar, kwa niaba ya Taasisi ya Hassan Maajar Trust akishirikiana na Bwana Nehemiah Mchechu kwa niaba ya Shirika La Nyumba La Taifa, walikabidhi madawati hayo kwa Mkuu wa Mkoa wa Singida Dr. Parseko V Kone.

“Napenda kutoa shukurani za dhati kwa Wakfu wa Hassan Maajar na Shirika La Nyumba La Taifa kwa msaada hu mkubwa utakaochangia kuboresha elimu Singida’, alisema Dr. Kone.  

 

 

Wanafunzi mkoani Singida, hususan, walioko vijijini wanakabiliwa na changamoto kubwa la kwanza likuwa mazingira ya kusomea, hivyo tunafarijika kuona wabia wanotusaidia kuboresha mazingira ya elimu kwa watoto wetu. Hii inakuza viwango na kuhimiza matokeo bora”, aliongeza.

Chini wa mradi wa Hassan Maajar Trust wa “Dawati Kwa Kila Mtoto”, (A Desk For Every Child) mkoa wa Singida wa pili kati ya mitano itakayonufaika kwa msaada inyaotelewa na Hassan Maajar Trust kwa kutumia fedha zilizopatikana na michango iliyotolewa kufwatia kampeni iliyoanzishwa Desemba 2011. Garama za madawati haya ni Tsh 22,500,000, kati ya hizo Shirika La Nyumba La Taifa limetoa jumla ya Tsh 10,000,000.

“Tunataka kuhakikisha kuwa kampeni ya Dawati Kwa Kila Mtoto inawafikia watoto wengi iwezekenavyo na kujenga maisha bora kwa watoto hao”, alisema Zena Tenga, Mkurugenzi Mtendaji. “Tunashukuru Shirika La Nyumba La Taifa kwa kuunga mkono juhudi zetu. 

 

Tutaendelea kuhamasisha ushirikiano na wote wenye nia ya kuona lengo la Hassan Maajar Trust la kuhakikisha watoto wetu wakiondoka sakafuni na kukaa kwenye madawati lina timia”,aliongeza.

 “Tunafurahi kuona kwamba mchango wa shirika letu sasa uko katika hali ya madawati ambapo watoto watakaa na watafurahia masomo ‘, alisema Bw. Mchechu, Mkurugenzi Mkuu wa Shirika La Nyumba La Taifa.   , “ Shirika la Nyumba La Taifa lilishirikiana vema na Taasisi ya Hassan Maajar Trust kuchangia fursa hii adimu kwa wanafunzi na maendeleo ya elimu kwa ujumla”, aliongeza.



Kuhusu Hassan Maajar Trust
Taasisi ya Hassan Maajar Trust imeandikishwa kama kampuni au NGO isiyo na hisa na yenye kudhaminiwa na kufanya kazi za hisani bila faida. Lengo kuu la Taasisi ya Hassan Maajar Trust ni kuboresha mazingira ya elimu katika shule za Tanzania.

Kwa maelezo zaidi tembelea: www.hassanmaajartrust.org | www.hassanmaajartrust.blogspot.com

Kuhusu Shirika La Nyumba La Taifa
Malengo ya Shirika la Nyumba la Taifa ni kuwa kampuni bora katika kuendeleza na kusimamia ujenzi wa nyumba na majengo mengine yenye ubora kwa matumizi ya umma. Ikifanya kazi katika misingi sahihi na imara ya kibiashara.
Kwa maelezo zaidi tembelea : www.nhctz.com

MLEMAVU WA NGOZI (ALBINO) ASIMAMISHWA SHULE KWA KUTUHUMIWA KUWA MSHIRIKINA MLOWO MBOZI

MLEMAVU WA NGOZI (ALBINO) ASIMAMISHWA SHULE KWA KUTUHUMIWA KUWA MSHIRIKINA MLOWO MBOZI

Amina Mwamkinga alisema tangu tarehe tisa alipofukuzwa bwenini na wanafunzi wenzie wakitaka aondoke shuleni hapo wakimtuhumu kuwa mchawi majira ya usiku hali iliyomlazimu kuomba hifadhi kwa mlinzi aliyemkubalia na kukesha naye hadi asubuhi  hali iliyopelekea kupigwa na baridi kali kutokana na kukosa nguo za kujisitiri kama Shuka nk.

Hapa Amina akimsimulia mkasa mzima mwandishi wa Mbeya yetu Joseph Mwaisango mara baada ya kupata maelezo yote ya Amina mwandishi wetu alimpigia simu katibu wa chama cha maalbino mkoa wa Mbeya afike ofisi ya Mbeya yetu ili wasaidiane kutatua tatizo hilo

katibu wa Chama cha Albino Mkoa wa Mbeya, Wiliamu Simwale alifika ofisi ya Mbeya yetu na kuanza kumsikiliza Amina

katibu wa Chama cha Albino Mkoa wa Mbeya, Wiliamu Simwale akiwa makini kumsikiliza Amina katika ofisi ya Mbeya yetu

KATIKA Hali isiyokuwa ya Kawaida Uongozi wa Shule ya Sekondari Hollwood iliyoko Mlowo Wilayani Mbozi Mkoa wa Mbeya imemsimamisha shule Mwanafunzi wa kidato cha tatu kwa takribani Miezi Miwili kwa madai kuwa anajihusisha na imani za Kishirikina.

  

Mwanafunzi huyo aliyejulikana kwa jina la Amina Mwankinga(20) ambaye ni mlemavu wa ngozi(Albino) alisimamishwa shule na uongozi wa Shule hiyo tangu Machi 9, Mwaka huu baada ya uongozi wa Shule hiyo kupata taarifa kutoka kwa Wanafunzi wakimtuhumu Mwenzao huyo kuwa ni Mshirikina.

  

Uongozi wa Shule hiyo baada ya kupata taarifa hizo ulimwamuru mhanga wa tukio hilo kuondoka Shuleni hapo pasipo kufuatilia na kujua ukweli wa jambo hilo na kupata udhibiti hivyo kumwacha Mwanafunzi huyo akizurura mitaani asijue hatma ya maisha yake.

  

Mhanga wa tukio hilo Amina Mwankinga alisema tangu tarehe tisa alipofukuzwa bwenini na wanafunzi wenzie wakitaka aondoke shuleni hapo majira ya usiku hali iliyomlazimu kuomba hifadhi kwa mlinzi aliyemkubalia na kukesha naye hadi asubuhi  hali iliyopelekea kupigwa na baridi kali kutokana na kukosa nguo za kujisitiri kama Shuka nk.

Anasema kutokana na hali hiyo Walimu pamoja na uongozi wa Shule hiyo haukuchukua hatua yoyote jambo lililomlazimu kuondoka Shuleni hapo  baada ya kukosa msaada ambapo alirejea Jijini Mbeya anakoishi na Binamu yake.

  

Binti huyo anayesomeshwa na Shirika la Under the SameSun  iliyoko Jijini Dar Es Salaam aliwaambia waandishi wa habari kuhusu mkasa uliompata huku akiomba msaada kwa wasamaria wema kumtafutia Shule ili aendelee na masomo kwa ajili ya kujiandaa na mtihani wa kidato cha nne Mwakani.

  

Kwa upande wake Mkuu wa Shule ya HollyWood Ambukeghe Mtafya, alipopigiwa simu kuhusu tuhumahizo alikiri kulijua suala hilo na kwamba walimrudisha mwanafunzi huyo nyumbani ili kumnusuru na kipigo kutoka kwa wanafunzi wenzie na kuongeza kuwa aliambiwa atafute shule nyingine ili ahamie.

  

Naye katibu wa Chama cha Albino Mkoa wa Mbeya, Wiliamu Simwale  alisema alikuwa  halijui suala hilo na kwamba kama lingekuwa suala liko nyeti angejulishwa yeye juu ya hatua zilizofikiwa ambapo Uongozi wa Shule umeendelea kupokea fedha za malipo ya Mwanafunzi pasipo kutoa taarifa kwenye shirika linalolipa.

Mlezi wa Wanafunzi hao kutoka Shirika la Under the Samesun Omary Mfaume amesema kwamba hana taarifa zozote  kuhusiana na tukio hilo na kuongeza kuwa anawasiliana na uongozi wa Shule moja kwa moja ili umweleze juu ya kilichotokea ili taratibu za kumtafutia Shule nyingine zifanyika haraka ili Mwanafunzi aendelee na masomo kama kawaida.

Na Mbeya yetu

Wanafunzi wageuka 'manamba' kusaka ada

WANAFUNZI wa kidato cha nne katika Shule ya Sekondari Mwangaza, iliyopo wilayani Mpanda, wako hatarini kufanya vibaya mitihani yao ya taifa kutokana na kutumia muda wa masomo kufanya vibarua ili waweze kupata fedha za kulipia ada na michango mbalimbali.

Mkuu wa shule hiyo, Simoni Lubange alibainisha hayo  mbele ya waandishi wa habari ambao walitembelea shuleni hapo hivi karibuni.

Alisema tatizo hilo lilianza mwaka jana baada shirika lisilo la kisekali la Shdepha Network lililokuwa likiwagharamia kuwasomesha kusitisha msaada huo.

Lubange alisema hali hiyo inaweza kuwafanya wanafunzi hao kufanya vibaya mtihani wao wa kumaliza kidato cha nne kutokana na kutumia muda wa masomo kufanya vibarua.

Mmoja wa wanafunzi hao, Sudi Mwimbula alisema kitendo cha shirika hilo kuacha kuwagharamia kumewaathiri kimasomo, kwani ndio waliokuwa wakiwapatia huduma zote shuleni.

Alisema si kama wanapenda kufanya vibarua mitaani, bali wanalazimika ili waweze kupata fedha za kulipia ada.

Mratibu wa Shdepha Network Wilaya ya Mpanda, EuzebiusNgurusha alisema shirika hilo lilikuwa likiwasomesha wanafunzi 312 kwa kuwalipia ada, sare za shule na vifaa mbalimbali vya matumizi ya shule.

Hata hivyo, alisema walilazimika kusitisha misaada hiyo baada ya wafadhili wao waliokuwa wakitoa misaada kwao kuisitisha mwaka jana, hali iliyolilazimu shirika hilo kuziandikia barua shule zote walizokuwa wakiwahudumia wanafunzi hao kuacha ufadhili.

BUDECO kujenga shule ya bweni kuwanusuru wanafunzi Busega

JUMUIYA ya Maendeleo ya Wanabusega (BUDECO) inatarajia kujenga shule ya bweni kwa ajili ya kuwasaidia wanafunzi wanaokosa nafasi za kujiunga na sekondari za serikali katika jimbo la Busega.

Mwenyekiti wa jumuia hiyo, Ginhu Maselle, alibainisha hayo jijini Dar es Salaam alipokuwa akitoa taarifa mbalimbali.

Alisema shule hiyo itakapokamilika itakuwa chini ya usimamizi wao lengo likiwa ni kuhakikisha wana Busega wanasonga mbele katika sekta ya elimu.

Aidha alikanusha madai kuwa jumuia hiyo imeingia katika mrengo wa kisiasa na kusisitiza kuwa jumuia hiyo ni kwa ajili ya maendeleo ya wana Busega bila kujali dini, rangi au kabila.

Naye Jaji Mstaafu, Thomas Mihayo, ambaye pia ni mlezi wa jumuia hiyo, alisema yasiwekwe matarajio ya juu zaidi kwani yakiwekwa hayo na kushindwa kufanikiwa yatasababisha wakate tamaa ya kuendelea na kikundi.

Mbunge awataka Wamasai wauze mifugo wasomeshe watoto wao

Mbunge Joshua Nassari akiwa na baadhi ya wabunge wenzake wa Chadema

WAFUGAJI Kimasai wametakiwa kuuza mifugo na kusomesha watoto wao ili wapate elimu itakayowawezesha kupata fursa mbalimbali za kiuchumi, kijamii na kisiasa kama jamii nyingine nchini.

Mbunge wa Arumeru Mashariki, Joshua Nassari, alitoa wito huo katika harambee ya ujenzi wa shule ya sekondari katika eneo la Ngarbobo, wilayani Arumeru.

Nassari alisema jamii hiyo iko nyuma katika nyanja za kimaendeleo kutokana na kuendelea na mfumo wa ufugaji wa kuhamahama, jambo ambalo limesababaisha watoto wengi katika jamii hiyo kukosa fursa ya kupata elimu.

“Nawasihi ndugu zangu Wamasai sasa muanze kuwekeza katika elimu kwa watoto wenu nyakati hizi hakuna njia nyingine ya kutatua changamoto ni elimu pekee ndiyo njia ya kuweza kuleta faida isiyokwisha katika maisha yenu,” alisema Nassari.

Aidha mbunge huyo aliwapongeza wananchi wa eneo hilo kwa kujitokeza kwa wingi na kutoa mifugo kwa ajili ya ujenzi wa shule hiyo na kusema kuwa huo ndio mwanzo mpya wa jamii hiyo kuanza kubadilika kwa dhati na kuthamini elimu.

Aliwaambia wafugaji hao kwamba jamii hiyo imekuwa ikitoa viongozi waadilifu na wachapa kazi akiwemo waziri Mkuu mstaafu, Edward Lowasa.

“Kwa asili mmejaliwa kuwa na watu wenye misimamo na maamuzi yenye masilahi kwa umma, wasomesheni watoto wenu ili waweze kutoa mchango katika kujenga taifa letu katika nyanja za kiuchumi na hata kisiasa,” alisema Nassari.

Aliwaambia wafugaji hao kuwa yeye alisoma katika hali ngumu na wakati fulani akisoma shule ya sekondari wazazi wake walilazimika kuuza kabati la vyombo, ili apate ada.

Alisema aliweza kusoma vizuri na kumaliza Chuo Kikuu ambapo sasa ana uwezo wa kununua kila anachokihitaji katika maisha yake na jamii yake.

Katika harambee hiyo wananchi walitoa ng’ombe zaidi ya 50 wenye thamani ya sh milioni 15, mbuzi na kondoo wenye tahamni ya sh milioni saba.

Harambee hiyo iliyoendeshwa na Mwenyekiti wa Chama cha Mapinduzi (CCM), Mkoa wa Arusha, Onesmo Nangole, kwa niaba ya Lowasa jumla ya sh milioni 53 zilipatikana

Ushirikisha wasababisha shule kufungwa Mbeya

SERIKALI wilayani Kyela kupitia Idara ya Elimu imetangaza kuifunga Shule ya Msingi Kilasilo iliyopo Kata ya Ikimba kutokana na kukithiri kwa vitendo vinavyodhaniwa kuwa vya kishirikina vinavyosababisha shule hiyo pamoja na nyumba za walimu kuwaka moto wa ajabu wakati wa usiku.

Mwenyekiti wa Kijji cha Kilasilo, Fillipo Mwambela, ambaye alidai chanzo cha tatizo hilo ni baada ya kuletwa walimu tisa wa mazoezi shuleni hapo wakitokea Chuo cha Ualimu Mpuguso, wilayani Rungwe.

Alisema baada ya walimu hao kufika, serikali ya kijiji kwa kushilikiana na uongozi wa shule walitoa jengo moja jipya lililojengwa kwa nguvu za wananchi lenye vyumba vitatu kwa lengo la kukaliwa na walimu hao na wengine ambao hawajaripoti.

Baada ya walimu hao kukabidhiwa jengo hilo na kupata kadhia hiyo wakati wa usiku, walitoa taarifa kwa uongozi wa shule na baadaye serikali ya kijiji ambayo iliitisha mkutano wa dharura na wazee wa kimila walikemea na kudai kuwa kama tatizo hilo litaendelea tena watamtaja anayefanya mambo hayo.

Aliendelea kusema usiku wa siku hiyo mambo yalizidi kuwa makubwa, hali iliyowalazimu walimu hao kuikimbia na kwenda kuomba hifadhi nyumba za jirani.

Kaimu Ofisa Elimu Msingi wa Wilaya, Kassim Mtili, mbali na kukiri kuwepo kwa tatizo hilo pia aliwataka wananchi kuacha kujihusisha na vitendo vya kishirikina na badala yake wajikite kuwekeza katika elimu kwa kuwasomesha watoto wao.

Alisema tatizo hilo si la kwanza, kwani katika siku za hivi karibuni kulikuwapo na tatizo la wanafunzi kuanguka na kupoteza fahamu.